കുട്ടികളുടെ പ്രായപരിധി 16 ആയി കുറയ്ക്കാൻ സമയമായെന്ന് ഹൈക്കോടതി

കുട്ടികളുടെ അവകാശ നിയമപ്രകാരം കുട്ടികളുടെ ഉയർന്ന പ്രായപരിധി 16 വയസ്സായി കുറയ്ക്കാൻ നിയമനിർമ്മാണ സഭകൾ പരിഗണിക്കണമെന്ന് ഹൈക്കോടതി വ്യക്തമാക്കി. 16 വയസ്സോടെ കുട്ടികൾക്ക് മതിയായ മാനസിക പക്വത കൈവരിക്കുന്നുണ്ട് എന്നതാണ് നിലവിലെ പ്രവണതകൾ സൂചിപ്പിക്കുന്നതെന്ന് ജസ്റ്റിസ് എ. ബദറുദ്ദീൻ നിരീക്ഷിച്ചു. നെടുംബശ്ശേരിയിൽ 19 വയസ്സുകാരൻ മദ്യപിച്ച് ആഡംബര കാറോടിച്ച് മൂന്നുപേർ മരിച്ച സംഭവത്തിൽ എക്സൈസ് ഉദ്യോഗസ്ഥർക്കെതിരെ വിജിലൻസ് അന്വേഷണം ആവശ്യപ്പെട്ടുള്ള ഹർജിയിലാണ് ഈ ഇടക്കാല ഉത്തരവ്.നിലവിൽ 18 വയസ്സിന് താഴെയുള്ളവരെയാണ് കുട്ടികളുടെ അവകാശ നിയമപ്രകാരം കുട്ടികളായി കണക്കാക്കുന്നത് എന്ന് കോടതി ചൂണ്ടിക്കാട്ടി. 18 വയസ്സിന് താഴെയുള്ളവർ പല സ്ഥലങ്ങളിലും വാഹനാപകടങ്ങൾ ഉണ്ടാക്കുന്നുണ്ടെന്നും കോടതി നിരീക്ഷിക്കുകയുണ്ടായി. 23 വയസ്സിന് താഴെയുള്ളവർക്ക് മദ്യം വിൽക്കുന്നതും വിളമ്പുന്നതും ഉപയോഗിക്കുന്നതും നിരോധിക്കുന്ന കേരള അബ്കാരി നിയമത്തിലെ വ്യവസ്ഥകൾ കർശനമായി നടപ്പിലാക്കാൻ സ്വീകരിച്ച നടപടികൾ വിശദീകരിക്കാൻ സർക്കാരിനോട് കോടതി നിർദ്ദേശിച്ചു.ഈ വിഷയത്തിൽ വിശദമായ മറുപടി നൽകാനും സർക്കാരിനോട് ആവശ്യപ്പെട്ടിട്ടുണ്ട്. വിനോദ് വിക്രമൻ പിള്ള സമർപ്പിച്ച ഹർജി പരിഗണിച്ചാണ് കോടതിയുടെ ഈ നിർദേശങ്ങൾ. 23 വയസ്സിന് താഴെയുള്ളവർക്ക് മദ്യം നൽകുന്നത് നിയമം നിരോധിക്കുന്നുണ്ടെങ്കിലും ഇത് പാലിക്കപ്പെടുന്നില്ലെന്ന് ഹർജിയിൽ ആരോപിക്കുന്നു.