Shobha Surendran: മുഖ്യമന്ത്രിയുടെ ഭാര്യ അമ്പലപ്പുഴയിൽ പാൽപ്പായസ വഴിപാട് നേർന്നു; ‘അയ്യപ്പശാപ’മെന്ന് ശോഭ സുരേന്ദ്രൻ – bjp leader shobha surendran says cm pinarayi vijayan is afraid of curse of lord ayyappa

തിരുവനന്തപുരം: നിയമസഭാ തെരഞ്ഞെടുപ്പ് കഴിഞ്ഞ ശേഷവും ശബരിമല വിഷയം വിടാതെ ബിജെപി നേതാക്കള്‍. മുഖ്യമന്ത്രി പിണറായി വിജയന് അയ്യപ്പശാപം പേടിയാണെന്നായിരുന്നു കഴക്കൂട്ടത്തെ എൻഡിഎ സ്ഥാനാര്‍ഥിയും ബിജെപി നേതാവുമായ ശോഭ സുരേന്ദ്രൻ്റെ പ്രതികരണം. അയ്യപ്പശാപം അകറ്റാൻ മുഖ്യമന്ത്രിയുടെ ഭാര്യ അമ്പലപ്പുഴ പാൽപ്പായസ വഴിപാട് നേര്‍ന്നെന്നും ശോഭ സുരേന്ദ്രൻ പറഞ്ഞു.

സിപിഎമ്മിനും മുഖ്യമന്ത്രി പിണറായി വിജയനുമെതിരെ കടുത്ത ആരോപണമാണ് ശോഭ സുരേന്ദ്രൻ ഉന്നയിച്ചത്. സിപിഎമ്മിലുള്ളത് അസുരന്മാരാണെന്നായിരുന്നു ശോഭ സുരേന്ദ്രൻ്റെ വിമര്‍ശനം.

Also Read: സിപിഎമ്മിന് എത്ര ചോര കുടിച്ചാലും മതിയാവില്ലെന്ന് രമേശ് ചെന്നിത്തല

ശബരിമല ഉള്‍പ്പെടെയുള്ള വിവാദവിഷയങ്ങള്‍ മുൻനിര്‍ത്തിയായിരുന്നു ബിജെപി സിപിഎമ്മിനെതിരെ നിയമസഭാ തെരഞ്ഞെടുപ്പിൽ പ്രചാരണം നയിച്ചത്. ശബരിമല വിഷയത്തിൽ തെരഞ്ഞെടുപ്പ് ദിവസം രാവിലെ മുഖ്യമന്ത്രി പിണറായി വിജയൻ അടക്കമുള്ള എൽഡിഎഫ് നേതാക്കള്‍ ശബരിമല വിഷയത്തിൽ നടത്തിയ പ്രതികരണങ്ങളും വലിയ വാര്‍ത്തയായരുന്നു. എൻഎസ്എസ് ജനറൽ സെക്രട്ടറി സുകുമാരൻ നായരുടെ പ്രസ്താവനയ്ക്ക് പിന്നാലെയായിരുന്നു മന്ത്രിമാരുടെ പ്രതികരണങ്ങള്‍.

Also Read: മാവേലിക്കരയിലെ മുൻ സിപിഎം നേതാവായ എൻഡിഎ സ്ഥാനാർത്ഥിയെ വീട് കയറി ആക്രമിച്ചു

ഇക്കുറി സംസ്ഥാനത്ത് മികച്ച വിജയം നേടുമെന്നാണ് ബിജെപി നേതാക്കള്‍ വിശദീകരിക്കുന്നത്. പാലക്കാട് മണ്ഡലത്തിൽ വിജയം ഉറപ്പാണെന്ന് ഡിഎംആര്‍സി മുൻ ചെയര്‍മാനും മണ്ഡലത്തിലെ എൻഡിഎ സ്ഥാനാര്‍ഥിയുമായ ഇ ശ്രീധരൻ വ്യക്തമാക്കിയിരുന്നു. പാലക്കാട് എംഎൽഎ ഓഫീസ് തയ്യാറാക്കിയെന്നും ശ്രീധരൻ വ്യക്തമാക്കി. താൻ പതിനയ്യായിരത്തിലധികം വോട്ടുകള്‍ക്ക് വിജയിക്കുമെന്ന് നേമത്തെ ബിജെപി സ്ഥാനാര്‍ഥി കുമ്മനം രാജശേഖരനും വ്യക്തമാക്കിയിട്ടുണ്ട്.