samyuktha menon new car: ‘ഇമ്മിണി ബല്യ’ ബിഎംഡബ്ള്യു 3 സീരീസ് സ്വന്തമാക്കി നടി സംയുക്ത മേനോൻ – actress samyuktha menon buys bmw 3 series gran limousine

2016ൽ പോപ്‌കോൺ എന്ന സിനിമയിലൂടെ മലയാള സിനിമ ലോകത്തെത്തിയ നടിയാണ് സംയുക്ത മേനോൻ. പാലക്കാട് സ്വദേശിയായ സംയുക്ത മേനോൻ പക്ഷെ ശ്രദ്ധിക്കപ്പെട്ടത് ടോവിനോ തോമസ് നായകനായ തീവണ്ടി സിനിമയിലൂടെയാണ്. പിന്നീട് ലില്ലി, ഒരു യമണ്ടൻ പ്രേമകഥ, കൽക്കി, എടക്കാട് ബറ്റാലിയൻ, ആണും പെണ്ണും, എരിഡാ തുടങ്ങിയ സിനിമകളിലൂടെ മലയാളത്തിൽ സജീവമായി സംയുക്ത മേനോൻ. താരത്തിന്റെ പുതിയ വിശേഷം പുത്തൻ കാറാണ്. ജർമൻ ആഡംബര കാർ നിർമ്മാതാക്കളായ ബിഎംഡബ്ള്യുവിന്റെ 3 സീരീസ് സെഡാനാണ് സംയുക്ത മേനോൻ സ്വന്തമാക്കിയത്.

മെൽബൺ റെഡ് മെറ്റാലിക് നിറത്തിലുള്ള തന്റെ പുത്തൻ ബിഎംഡബ്ള്യു 3 സീരീസുമൊത്തുള്ള ചിത്രങ്ങൾ സംയുക്ത തന്നെയാണ് സമൂഹ മാധ്യമങ്ങളിൽ പോസ്റ്റ് ചെയ്തിരിക്കുന്നത്. ‘എന്റെ സന്തോഷം നിങ്ങൾ എല്ലാവരുമായും പങ്കിടുന്നു’ എന്ന കുറിപ്പോടെയാണ് സംയുക്ത മേനോൻ തന്റെ പുത്തൻ കാറിന്റെ ചിത്രങ്ങൾ പോസ്റ്റ് ചെയ്തിരിക്കുന്നത്.

സാനിയ മുതൽ നൈല വരെ; ഈ വർഷം പുത്തൻ കാർ സ്വന്തമാക്കിയ 7 മലയാള നടികൾ

‘ഇമ്മിണി ബല്യ’ 3 സീരീസ്

ബിഎംഡബ്ള്യു ഈ വർഷത്തിന്റെ തുടക്കത്തിൽ വിപണിയിലെത്തിച്ച 3 സീരീസ് ഗ്രാൻ ലിമോസിനാണ് സംയുക്ത മേനോൻ വാങ്ങിയിരിക്കുന്നത്. ലക്ഷ്വറി ലൈൻ പതിപ്പിലും എം സ്പോർട്ട് പതിപ്പിലും വാങ്ങാവുന്ന 3 സീരീസ് ഗ്രാൻ ലിമോസിന് 52.50 ലക്ഷം മുതൽ 53.90 ലക്ഷം വരെയാണ് എക്‌സ്-ഷോറൂം വില. സാധാരണ 3 സീരീസ് സെഡാനെക്കാൾ നീളം കൂടുതലാണ് ഗ്രാൻ ലിമോസിൻ പതിപ്പിന്. രണ്ടാം നിര യാത്രക്കാർക്കുള്ള ഡോറിന്റെ നീളക്കൂടുതൽ ഇത് വ്യക്തമാക്കും. 3 സീരിസിനെക്കാൾ 110 എംഎം വീൽബേസ് വർദ്ധിച്ച് 2,851 എംഎം ആണ് ഗ്രാൻ ലിമോസിൻ പതിപ്പിന്റെ വീൽബേസ്. സ്റ്റാൻഡേർഡ് മോഡലിനേക്കാൾ 120 എംഎം നീളവും കൂടുതലാണ് ഗ്രാൻ ലിമോസിന്. മാത്രമല്ല ഗ്രാൻ ലിമോസിൻ പതിപ്പിൽ പിൻ നിര യാത്രക്കാർക്ക് 43 എംഎം കൂടുതൽ ലെഗ് സ്പേസ് ലഭിക്കും.

258 എച്ച്പി പവർ ഉത്പാദിപ്പിക്കുന്ന 2.0 ലിറ്റർ ടർബോ-പെട്രോൾ എഞ്ചിൻ (330 Li), 190 എച്ച്പി പവർ നിർമ്മിക്കുന്ന 2.0 ലിറ്റർ ടർബോ-ഡീസൽ എൻജിൻ (320 Ld) എന്നിങ്ങനെ രണ്ട് എഞ്ചിനുകളിൽ 3 സീരീസ് ഗ്രാൻഡ് ലിമോസിൻ വാങ്ങാം. ഇതിൽ ഏതാണ് സംയുക്ത മേനോൻ തിരഞ്ഞെടുത്തിരിക്കുന്നത് എന്ന് വ്യക്തമല്ല.