അന്വേഷണം വൈകിയത് വേദനാജനകം, എന്നും അനന്യയെ പിന്തുണച്ചിട്ടേ ഉള്ളു- രഞ്ജു രഞ്ജിമാർ | ananya kumari alex| ananya kumari alex news| ananya kumari alex instagram

ട്രാന്‍സ്‌ജെന്‍ഡര്‍ അനന്യയുടെ മരണത്തിൽ എറണാകുളം റെനെ മെഡിസിറ്റിക്ക് എതിരെ വകുപ്പുതല അന്വേഷണം പ്രഖ്യാപിച്ചിരിക്കുകയാണ് സംസ്ഥാന സര്‍ക്കാര്‍. അന്വേഷണം നടത്തി ഒരു മാസത്തിനകം റിപ്പോര്‍ട്ട് നല്‍കാനാണ് ആരോ​ഗ്യവകുപ്പ് അഡീഷണൽ ഡയറക്ടർക്ക് നിർദേശം നൽകിയിരിക്കുന്നത്. ലിംഗമാറ്റ ശസ്ത്രക്രിയയില്‍ പിഴവുകള്‍ സംഭവിച്ചെന്നും അതിലെ മനോവിഷമത്തിലാണ് ജീവനൊടുക്കിയതെന്നും ആരോപിച്ച് പ്രീജിത്ത് എന്ന വ്യക്തി സമർപ്പിച്ച പരാതിയിലാണ് നടപടി. ഈ സാഹചര്യത്തിൽ മാതൃഭൂമി ഡോട്ട്കോമുമായി മനസ്സു തുറക്കുകയാണ് അനന്യയുടെ വളർത്തമ്മയും സെലിബ്രിറ്റി മേക്കപ് ആർട്ടിസ്റ്റുമായ രഞ്ജു രഞ്ജിമാർ. 

വൈകിയത് വേദനാജനകം

സത്യത്തിൽ അന്വേഷണം പ്രഖ്യാപിക്കാൻ ആറുമാസമെടുത്തു എന്നത് വേദനാജനകമാണ്. കാരണം സർജറിക്കുശേഷം അനന്യക്കുണ്ടായിട്ടുള്ള ആരോ​ഗ്യപ്രശ്നങ്ങളെ ചൂണ്ടിക്കാട്ടി പലപ്പോഴും സർക്കാരിനെ സമീപിച്ചിരുന്നു. അപ്പോഴൊന്നും വ്യക്തമായ മറുപടി തരാനോ അന്വേഷണത്തിന് ഉത്തരവിടാനോ തയ്യാറായിരുന്നില്ല. വൈകിയാണെങ്കിലും അന്വേഷണം ഇപ്പോൾ പ്രഖ്യാപിച്ചതിനെ വളരെയധികം സ്വാ​ഗതം ചെയ്യുന്നു. ഇപ്പോഴെങ്കിലും അതിന് സന്മനസ്സു തോന്നിയ കേരള സർക്കാരിന് അഭിനന്ദനങ്ങൾ.

അനന്യയുടേത് സങ്കീർണമായ സർജറി തന്നെയായിരുന്നു. ഒരുവർഷത്തോളം അവൾ അനുഭവിച്ച ശാരീരിക മാനസിക വേദന പറഞ്ഞറിയിക്കാനാവില്ല. പക്ഷേ അതിനുള്ള പരിഹാരം എന്ന നിലയിൽ ആശുപത്രിയുടെ ഭാ​ഗത്തുനിന്ന് യാതൊരു സമീപനവും ഉണ്ടായില്ല. രൂക്ഷമായ പ്രശ്നങ്ങൾ ഉണ്ടായപ്പോഴെങ്കിലും ആശുപത്രിയിൽ നിന്ന് വ്യക്തമായ മറുപടി ലഭിച്ചിരുന്നെങ്കിൽ അനന്യ ആത്മഹത്യയിലേക്ക് പോകുമായിരുന്നില്ല.

ഒപ്പം തന്നെ ഇപ്പോഴും പലയിടങ്ങളിലും ഇത്തരത്തിൽ വേണ്ടത്ര അവബോധമില്ലാതെ സർജറികൾ നടക്കുന്നുണ്ട്. ചുമരിൽ ഒരു ചിത്രം വരയ്ക്കുന്നപോലെ അതിമനോഹരമായി ശരീരത്തിൽ മാറ്റങ്ങൾ വരുത്താം എന്നത് സാധ്യമല്ലെങ്കിലും ഇതിനെപ്പറ്റി കൃത്യമായ മാർ​ഗനിർദേശങ്ങൾ ആശുപത്രികളുടെ ഭാ​ഗത്ത് നിന്ന് പുറപ്പെടുവിക്കേണ്ടതാണ്. എന്താണ് സർജറി എന്നും അതിന്റെ ഭവിഷ്യത്തുകൾ എന്താണെന്നുമൊക്കെ സർജറി ചെയ്യാൻ വരുന്ന കുട്ടികൾക്ക് കൊടുക്കേണ്ടതാണ്. പലപ്പോഴും ആശുപത്രികൾ സർജറിക്കു വരൂ എന്ന് അറിയിക്കുകയും വേണ്ട അവബോധം കൊടുക്കാതെ സർജറിയിലേക്ക് കടക്കുകയുമാണ് ചെയ്യുന്നത്. മാത്രമല്ല  പറഞ്ഞ പൈസയിൽ നിന്ന് സർജറിക്കുശേഷം ഭീമമായ തുക ആവശ്യപ്പെടുന്നുണ്ട്. ചിലർക്ക് റീസർജറി ആവശ്യമായി വരികയും ഇനി ചിലർക്ക് സർജറിക്കു ശേഷം അവർ ചെയ്തിരുന്ന സാധാരണ ജീവിതം നയിക്കാനാവാതെ വരികയുമൊക്കെ ചെയ്യുന്നുണ്ട്. എങ്ങനെയാണ് ഇവർ ഇതിനെയൊക്കെ അതിജീവിക്കേണ്ടത് എന്നത് സംബന്ധിച്ച് സർജറിക്ക് മുമ്പ് വ്യക്തത ലഭിക്കുന്നില്ല. ഒരു ട്രാൻസ് വ്യക്തിയെ സംബന്ധിച്ച് അവർ ആ​ഗ്രഹിക്കുന്ന സ്വത്വത്തിൽ എത്തുക എന്നത് സ്വപ്നമാണ്. അതിനായാണ് ഇത്ര വേദനാജനകമായ സർജറിയെ സമീപിക്കുന്നത്. ഡോക്ടർമാർക്ക് കീറിമുറിക്കാനും തുന്നിക്കെട്ടാനും പഠിക്കാനുള്ള ശരീരങ്ങളല്ല ഞങ്ങളുടേത്. ഈ അടുത്ത് ഒരു ട്രാൻസ്മെന്നിന്റെ സർജറി നാലുപ്രാവശ്യം റീസർജറി ചെയ്യേണ്ടതായി വന്നു എന്നറിഞ്ഞു. അവന്റെ പ്രതീക്ഷകളെല്ലാം അസ്തമിപ്പിക്കുന്ന സമീപനമാണത്. ഇനി ജീവിക്കണോ മരിക്കണോ എന്നാണ് അവൻ ചോദിക്കുന്നത്.  

കഴിഞ്ഞ ദിവസം കൂടി സർജറി പരാജയപ്പെട്ടതിനെക്കുറിച്ച് വിളിച്ചു പറഞ്ഞയാളുണ്ട്. അവരെയൊക്കെ മാനസികമായും ശാരീരികമായും സാമ്പത്തികമായുമൊക്കെ ചേർത്തുപിടിക്കാനാണ് ശ്രമിക്കുന്നത്. കാരണം ഒരുനിമിഷമൊന്നു കൈവിട്ടാൽ ആത്മഹത്യയിലേക്ക് പോകുന്ന അവസ്ഥയാണ് കുട്ടികൾക്കുള്ളത്. ആത്മഹത്യ എന്നത് ഒരു പരിഹാരമല്ല എന്ന് കുട്ടികൾ തിരിച്ചറിയണം. പോരാടാൻ ശ്രമിക്കുകയാണ് വേണ്ടത്.

അമ്മയായിട്ടും പിന്തുണച്ചില്ല എന്ന വിമർശനങ്ങൾ..

കമ്മ്യൂണിറ്റി അവൾക്കൊപ്പം നിന്നില്ല എന്നുപറയുന്നവരോട് ഒന്നും പറയാനില്ല. കാരണം ആത്മഹത്യ ചെയ്യുന്നതിന്റെ തലേന്ന് എന്റെ വീട്ടിലാണ് വന്നത്. റീസർജറി ചെയ്യുന്നതിനെക്കുറിച്ച് ഞാനാണ് പറഞ്ഞത്. അതിനുവേണ്ട ഫണ്ടിനെപ്പറ്റിയും മറ്റും സംസാരിച്ചിരുന്നു. എന്ത് ബുദ്ധിമുട്ടു വന്നാലും എന്നോടാണ് പങ്കുവെക്കേണ്ടത് എന്നാണ് പറഞ്ഞിരുന്നത്. ഒരിക്കൽപ്പോലും അവൾ ആത്മഹത്യ ചെയ്യുമെന്ന് വിശ്വസിക്കാനാവുന്നില്ല, കാരണം അത്ര ബോൾഡ് ആയ കുട്ടിയായിരുന്നു. പിന്നെ അവളെ ഞാൻ പിന്തുണച്ചോ ഇല്ലയോ എന്നതൊക്കെ എന്റെ വ്യക്തിപരമായ കാര്യമാണ്. അവൾ‍ക്കറിയാം ഞാനവളെ എത്ര പിന്തുണച്ചിരുന്നുവെന്ന്. അതുകൊണ്ടാണല്ലോ എന്റെ വീടിന്റെ തൊട്ടടുത്തു തന്നെ വീട് വാടകയ്ക്കെടുത്തത്. എന്റെ വീട്ടിൽ നിന്ന് അഞ്ഞൂറു മീറ്റർ ദൂരമോ അങ്ങോട്ടുണ്ടായിരുന്നുള്ളു. വീട്ടിലേക്ക് താമസം മാറാനുള്ള കാര്യങ്ങൾ നടന്നുകൊണ്ടിരിക്കുകയായിരുന്നു. എന്റെ മനസ്സാക്ഷിക്ക് നിരക്കാത്തതൊന്നും ഞാൻ ചെയ്തിട്ടില്ല. അവൾ എന്നും എനിക്ക് പ്രിയപ്പെട്ടവൾ തന്നെയായിരുന്നു. എന്നാലാവും വിധം അവളെ പിന്തുണയ്ക്കുകയും ചെയ്തിട്ടുണ്ട്. 

സർജറി ചെയ്യാൻ ഇരിക്കുന്നവരോട്?

സർജറി എന്നത് അവനവന്റെ സ്വപ്നമാണ്. പക്ഷേ അതിനു മുമ്പ് കൃത്യമായ പഠനം നടത്തേണ്ടതുണ്ട്. ശരീരത്തിലെ പ്രധാനപ്പെട്ട ഒരുഭാ​ഗമാണ് നീക്കം ചെയ്യുന്നത്. അതിലൂടെ ഭാവിയിൽ ശാരീരികമായി നിരവധി ബുദ്ധിമുട്ടുകൾ ഉണ്ടായേക്കാം. അതുകൊണ്ടുതന്നെ പരിചരണം പ്രധാനമാണ്. സർജറിക്കു ശേഷം മരുന്നുകൾ, ശുചിത്വം, ഭക്ഷണം, ഉറക്കം, വസ്ത്രം എന്നിവയിലൊന്നും വിട്ടുവീഴ്ച ചെയ്യരുത്. സർജറിക്കു ശേഷം ജീവിതം എളുപ്പമാണെന്ന് ധരിക്കരുത്. സർജറി ചെയ്ത് പത്തുദിവസം കഴിയുമ്പോഴേക്കും സ്വത്വം വരിച്ചു എന്നു കരുതരുത്. സർജറി കഴിഞ്ഞ് ഒരുവർഷമെങ്കിലും കഴിഞ്ഞേ യഥാർഥ ഫലം ലഭിക്കൂ. നമ്മുടെ ശരീരമാണ്, അതിനെ നോക്കേണ്ടത് നമ്മൾ തന്നെയാണ്. ആരുടെയെങ്കിലും വാക്കുകൾ കേട്ട് ആരെങ്കിലും ചൂണ്ടിക്കാണിക്കുന്നയിടത്ത് പോയി സർജറി ചെയ്യരുത്. വ്യക്തമായ പദ്ധതിയോടെ, പഠനത്തോടെ വേണം സർജറി തീരുമാനിക്കാൻ.

Content Highlights: transgender ananya medical negligence, ananya kumari alex surgery, sexual reassignment surgery