kashmiri pandit movie: ‘കശ്മീർ സുരക്ഷിതമായ സ്ഥലമല്ല, ട്രാൻസഫർ വേണമെന്ന് ആവശ്യപ്പെട്ടിരുന്നു’; കൊല്ലപ്പെട്ട കശ്മീരി പണ്ഡിറ്റിന്റെ ഭാര്യ – kashmiri pandit rahul bhat felt insecure says wife

കശ്മീരിലെ ചഡൂര എന്ന സ്ഥലത്ത് ജോലി ചെയ്യുന്നതിൽ രാഹുൽ ഭട്ട് ആശങ്ക പങ്കുവച്ചിരുന്നുവെന്നും ഇത് സംബന്ധിച്ച് പ്രാദേശിക ഭരണകൂടത്തോട് ജില്ലാ തലസ്ഥാനത്തേക്ക് മാറ്റം ആവശ്യപ്പെട്ടിരുന്നുവെന്നും ഇന്ത്യാ ടുഡെയ്ക്ക് നൽകിയ അഭിമുഖത്തിൽ മീനാക്ഷി ഭട്ട് പറഞ്ഞു.

തുടർച്ചയായി അപേക്ഷകൾ നൽകിയിട്ടും തന്റെ ഭർത്താവിന്റെ ആവശ്യം അംഗീകരിച്ചില്ലെന്നും അവർ പറഞ്ഞു.

ബഡ്ഗാമിലെ റവന്യൂ വകുപ്പിലായിരുന്നു രാഹുൽ ഭട്ട് ജോലി ചെയ്തിരുന്നത്. വ്യാഴാഴ്ച ഇയാളുടെ ഓഫീസിൽ എത്തിയ ഭീകരർ വെടിയുതിർക്കുകയും, ഗുരുതരമായി പരിക്കേറ്റ ഇയാളെ ആശുപത്രിയിലേക്ക് എത്തിച്ചെങ്കിലും മരിക്കുകയായിരുന്നു. പിന്നീട്, കശ്മീർ ടൈഗേഴ്സ് എന്ന ഭീകര സംഘടന ആക്രമണത്തിന്റെ ഉത്തരവാദിത്തം ഏറ്റെടുക്കുകയുമായിരുന്നു.

അതേസമയം, രാഹുലിന്റെ ഓഫീസിലുള്ള ചിലരെ തന്നെ സംശയിക്കുന്നതായി ഭാര്യ വ്യക്തമാക്കി. ഭീകരരുമായി അദ്ദേഹത്തിന്റെ ഓഫീസിലെ ചിലർ ഗൂഡാലോചന നടത്തിയതായും രാഹുൽ ഭട്ടിന്റെ ഭാര്യ ആരോപിച്ചു.

Also Read : മഴ വീണ്ടും കനക്കും: ഇന്ന് മൂന്നിടത്തും നാളെ ഒൻപതിടത്തും യെല്ലോ അലേർട്ട്

എല്ലാവരും തന്നോട് നന്നായി പെരുമാറുന്നുണ്ടെന്നും ആർക്കും തന്നെ ഉപദ്രവിക്കാൻ കഴിയില്ലെന്നും അദ്ദേഹം പറയാറുണ്ടായിരുന്നു. എന്നിട്ടും ആരും അദ്ദേഹത്തെ സംരക്ഷിച്ചില്ല, തീവ്രവാദികൾ അദ്ദേഹത്തെക്കുറിച്ച് ആരോടെങ്കിലും ചോദിച്ചിരിക്കണം, അല്ലാത്തപക്ഷം അവർ എങ്ങനെ അറിയുമെന്നും മീനാക്ഷി ചോദിക്കുന്നു.

പ്രധാനമന്ത്രിയേയും ആഭ്യന്തരമന്ത്രിയേയും അവർ വിമർശിച്ചിട്ടുണ്ട്. പ്രധാനമന്ത്രി നരേന്ദ്രമോദിയും കേന്ദ്ര ആഭ്യന്തരമന്ത്രി അമിത് ഷായും കശ്മീരി പണ്ഡിറ്റുകളെ ബലിയാടാക്കുന്നുവെന്നും മീനാക്ഷി പറഞ്ഞു. കാശ്മീരി പണ്ഡിറ്റുകളെ അവർ തങ്ങളുടെ രാഷ്ട്രീയത്തിനായി ഉപയോഗിക്കുന്നു. കാശ്മീരിൽ വന്ന് സുരക്ഷയില്ലാതെ കറങ്ങാൻ ഞാൻ അവരെ വെല്ലുവിളിക്കുന്നു.

Also Read : ബിരിയാണി മേളയിൽ ബീഫിനും പോർക്കിനും നിരോധനം; വിവാദം, മേള മാറ്റിവച്ച്

കശ്മീരി പണ്ഡിറ്റുകൾ പീഡിപ്പിക്കപ്പെടുന്നു. രാഷ്ട്രീയക്കാർ നിശബ്ദമാണ്. പ്രധാനമന്ത്രി മോദിയും ആഭ്യന്തര മന്ത്രി അമിത് ഷായും കശ്മീരി പണ്ഡിറ്റുകളോട് തീർത്തും നിസ്സംഗരാണെന്നും അവർ ആരോപിച്ചു. ആക്രമണത്തിൽ പ്രതിഷേധിച്ച് കശ്മീരി പണ്ഡിറ്റുകൾ പ്രതിഷേധം നടത്തി വരികയാണ്.