Rahul Gandhi: അഞ്ചാം ദിനം 12 മണിക്കൂർ; രാഹുൽ ഗാന്ധിയെ ഈയാഴ്ച ഇനി ചോദ്യം ചെയ്തേക്കില്ല – 11-hour quiz on day 5 ed may not call rahul gandhi again this week reports

Also Read : മഹാരാഷ്ട്രയിൽ നാടകീയ നീക്കങ്ങൾ; ഷിൻഡെയ്ക്കൊപ്പം 37 എംഎൽഎമാർ? വിമതർ ഗുവാഹത്തിയിൽ

അഞ്ച് ദിവസങ്ങളിലായി 50 മണിക്കൂറിലധികം നേരമാണ് വയനാട് എംപി കൂടിയായ രാഹുൽ ഗാന്ധിയെ ഇ ഡി ചോദ്യം ചെയ്തത്. കഴിഞ്ഞയാഴ്ചയാണ് ചോദ്യം ചെയ്യൽ ആരംഭിച്ചതെങ്കിലും അമ്മ സോണിയാ ഗാന്ധിയുടെ ആരോഗ്യനില ചൂണ്ടിക്കാട്ടി രാഹുൽ ചോദ്യം ചെയ്യലിന് ഹാജരാകാനുള്ള സമയം നീട്ടി വാങ്ങുകയായിരുന്നു.

കൊവിഡ് ബാധമൂലം ഉണ്ടായ ശാരീരിക അസ്വസ്ഥതകൾ കാരണം ആശുപത്രിയിലായിരുന്ന സോണിയ ഗാന്ധി കഴിഞ്ഞദിവസം ആശുപത്രി വിട്ടിരുന്നു. നാളെ ചോദ്യം ചെയ്യലിന് ഹാജരാകാൻ സോണിയ ഗാന്ധിയ്ക്കും ഇ ഡി നോട്ടീസ് നൽകിയിട്ടുണ്ട്. എന്നാൽ ആരോഗ്യാവസ്ഥ ചൂണ്ടിക്കാട്ടി അവർ സാവകാശം ചോദിച്ചേക്കുമെന്ന് റിപ്പോർട്ടുകളുണ്ട്.

രാഹുൽ ഗാന്ധിയും സോണിയ ഗാന്ധിയും ഡയറക്ടർമാരായ യങ് ഇന്ത്യ ലിമിറ്റഡിന്‍റെ സാമ്പത്തിക ഇടപാടുകൾ സംബന്ധിച്ചാണ് ചോദ്യം ചെയ്യൽ. ഡോടെക്സ് മെർച്ചൻഡെയ്സ് പ്രൈവറ്റ് ലിമിറ്റഡ് എന്ന കൊൽക്കത്ത ആസ്ഥാനമാക്കി പ്രവർത്തിക്കുന്ന കമ്പനിയും യംഗ് ഇന്ത്യൻ എന്ന കമ്പനിയും തമ്മിലുള്ള സാമ്പത്തിക ഇടപാടുകൾ സംബന്ധിച്ച ചോദ്യങ്ങളാണ് അന്വേഷണ സംഘം രാഹുലിനോട് കൂടുതലായി ചോദിച്ചത്.

Also Read : ‘അധികാരത്തിനു വേണ്ടി ചതിക്കില്ല’; സൂറത്തിൽ നിന്നും ഏക്നാഥ് ഷിൻഡെയുടെ ട്വീറ്റ്

ഒരു കോടി രൂപ പലിശ രഹിത വായ്പയായി യംഗ് ഇന്ത്യയ്ക്ക് ഡോടെക്സ് മെർച്ചൻഡെയ്സ് നൽകിയെങ്കിലും ഈ വായ്പാ തുക യംഗ് ഇന്ത്യ ഇതുവരെ തിരിച്ചടച്ചിട്ടില്ല. ഈ ഇടപാട് കള്ളപ്പണം വെളുപ്പിക്കലായിരുന്നു എന്ന നിഗമനത്തിലാണ് എൻഫോഴ്സ്മെന്‍റ് ഡയറക്ടറേറ്റ്.

അതേസമയം ഡൽഹിയിൽ കോൺഗ്രസിന്‍റെ നേതൃത്വത്തിൽ നടത്തിവരുന്ന പ്രതിഷേധം തുടരുകയാണ്. ഇന്നലെ നടന്ന പ്രതിഷേധ മാര്‍ച്ചില്‍ കേരളത്തില്‍ നിന്നുള്ള നേതാക്കള്‍ക്കടക്കം പരിക്കേറ്റു. പോലീസ് കൈയേറ്റം ചെയ്തുവെന്നാരോപിച്ച് വനിതാ നേതാവ് അല്‍ക്കാ ലാംബ മാധ്യമങ്ങള്‍ക്ക് മുന്നില്‍ പൊട്ടിക്കരഞ്ഞിരുന്നു.