Pathanamthitta Health Department Raid: ഇനി പേര് മറച്ചുവെക്കില്ല, മോശം ഭക്ഷണം നൽകിയാൽ പേര് വെളിപ്പെടുത്തി തന്നെ റെയ്‌ഡ്‌ – report on health department to publish hotels name after inspection

ആദ്യമായി പിടിക്കപ്പെട്ട് താക്കീത് നോട്ടീസ് നൽകുന്നവരെ പരസ്യ പ്രചാരണത്തിൽ നിന്നും ഒഴിവാക്കും എന്ന ന്യായം പറയാമെങ്കിലും നിരന്തരമായി ക്രമക്കേട് കണ്ടെത്തുന്നവരുടെ വിവരങ്ങൾ പോലും ലഭ്യമായിരുന്നില്ല. മിക്കപ്പോഴും പരിശോധനകൾ രഹസ്യമാക്കി വെക്കുകയും ചെയ്യും. എന്നാൽ ഇതിന് മാറ്റം വരുത്തി കഴിഞ്ഞ ദിവസം ക്രമക്കേടുകൾ കണ്ടെത്തിയ ഭക്ഷണ ശാലകളുടെ പേരുകൾ സഹിതം പ്രസിദ്ധീകരണത്തിന് നൽകി. പത്തനംതിട്ട നഗരസഭ ആരോഗ്യ വിഭാഗത്തിൻെറ നേതൃത്വത്തിൽ നഗരത്തിൻെറ വിവിധ ഭാഗങ്ങളിൽ പ്രവർത്തിച്ചിരുന്ന അങ്കിൾസ് ഹോട്ടൽ, അമാനി റസ്റ്റോറൻറ്, ഡയാന ഹോട്ടൽ, ഹെ ഡേ ബാർ, മുത്തൂറ്റ് ഹോസ്പിറ്റൽ കാൻറീൻ, ബെസ്റ്റ് ബേക്കറി ബോർമ എന്നിവിടങ്ങളിൽ നടത്തിയ പരിശോധനയിൽ പഴകിയതും ഉപയോഗയോഗ്യമല്ലാത്തതുമായ ഭക്ഷണപദാർത്ഥങ്ങൾ പിടിച്ചെടുത്തു.

നഗരസഭ ഹെൽത്ത് സൂപ്പർവൈസർ മുഹമ്മദ് ഫൈസലിന്റെ നേതൃത്വത്തിൽ നടത്തിയ പരിശോധനയിൽ ഹെൽത്ത് ഇൻസ്പെക്ടർമാരായ ദീപു രാഘവൻ, സുജിത എസ് പിള്ള തുടങ്ങിയവർ പങ്കെടുത്തു. സ്ഥാപനങ്ങൾക്ക് നിയമപരമായ പിഴ ചുമത്തി ന്യൂനതകൾ അടിയന്തരമായി പരിഹരിക്കുന്നതിന് നോട്ടീസ് നൽകിയിട്ടുണ്ട്. വരും ദിവസങ്ങളിൽ പരിശോധന കൂടുതൽ കർശനമാക്കുമെന്നും മുനിസിപ്പൽ സെക്രട്ടറി അറിയിച്ചു. എന്നാൽ ചില സ്ഥലങ്ങളിൽ ഇപ്പോഴും പഴയ രീതി മാറ്റിയിട്ടില്ല. വളളിക്കോട് ഗ്രാമപഞ്ചായത്തിൽ പഞ്ചായത്ത് ആരോഗ്യവകുപ്പ് ഉദ്യോഗസ്ഥര്‍ നടത്തിയ പരിശോധനയില്‍ പഴകിയ ഭക്ഷണം സൂക്ഷിച്ചിരുന്ന രണ്ട് ഹോട്ടലുകള്‍ക്ക് പിഴ ചുമത്തിയതായി വളളിക്കോട് ഗ്രാമപഞ്ചായത്ത് സെക്രട്ടറി അറിയിച്ചു.