വണ്ടിപ്പെരിയാർ ഗ്രാമ്പിയിലെ കടുവ ദൗത്യം തുടരുന്നു; പതിനഞ്ചാം വാർഡിൽ ഇന്ന് നിരോധനാജ്ഞ

ഇടുക്കി വണ്ടിപ്പെരിയാറിൽ ഇറങ്ങിയ കടുവയെ പിടികൂടാനുള്ള  ദൗത്യം ഇന്ന് ഊർജിതമായി തുടരുകയാണ്. ഗ്രാമ്പിയിലെ ജനവാസ മേഖലയിലെത്തിയ കടുവയെ മയക്കുവെടിവെച്ച് പിടികൂടാനുള്ള  ശ്രമമാണ് നടക്കുന്നത്.   ദൗത്യത്തിൻ്റെ പശ്ചാത്തലത്തിൽ പ്രദേശത്ത് ജില്ലാ ഭരണകൂടം നിരോധനാജ്ഞ പ്രഖ്യാപിച്ചു. വണ്ടിപ്പെരിയാര്‍ ഗ്രാമ പഞ്ചായത്ത്‌ പതിനഞ്ചാം വാർഡിൽ ഇന്ന് രാവിലെ ആറ് മണി മുതല്‍ വൈകുന്നേരം ആറ് മണിവരെയാണ് നിരോധനാജ്ഞ.

കടുവയുടെ സമീപത്ത് മനുഷ്യ സാമിപ്യം ഉണ്ടാകുന്നത്‌ അക്രമാസക്തനാകുന്നതിനും മനുഷ്യജീവന്‍ ഹാനികരമാകുന്നതിനും സാധ്യത ഉള്ളതായി ബോദ്ധ്യപ്പെട്ടിട്ടുള്ളതിനാല്‍ അപകട സാഹചര്യം ഒഴിവാക്കുന്നതിനും മനുഷ്യജീവന് സുരക്ഷിതത്വം ഒരുക്കുന്നതിനുമായി നിരോധനാജ്ഞ പ്രഖ്യാപിക്കുന്നുവെന്ന് ജില്ലാ കളക്ടറുടെ ഉത്തരവിൽ പറയുന്നു.
 
അതേസമയം രാവിലെ ഡ്രോൺ നിരീക്ഷണത്തിൽ കടുവയെ കണ്ടില്ലെന്നും ഇന്നലെയുണ്ടായിരുന്ന സ്‌ഥലത്തുനിന്നും കടുവ മാറിയിട്ടുണ്ടെന്നും എരുമേലി റേഞ്ച് ഓഫീസര്‍ കെ ഹരിലാൽ പറഞ്ഞു. മൂടൽ മഞ്ഞും തെരച്ചിലിന് വെല്ലുവിളിയാണ്. കടുവ കൂടുതൽ ദൂരം സഞ്ചരിക്കാൻ സാധ്യതയില്ലെന്നും ഡ്രോൺ ഉപയോഗിച്ചും നേരിട്ട് ഉറങ്ങിയും പരിശോധന നടത്തുമെന്നും ഹരിലാൽ പറഞ്ഞു.

മയക്കു വെടി വെച്ച് കടുവയെ പിടികൂടി തേക്കടിയിലേക്ക് മാറ്റാനാണ് വനം വകുപ്പിൻ്റെ നീക്കം. കടുവയ്ക്ക് ആരോഗ്യപ്രശ്നങ്ങളുണ്ട്. കാലിന് മുറിവേറ്റ നിലയിലാണ്. പിടികൂടാനായാൽ ആവശ്യമെങ്കിൽ ചികിത്സ നൽകുമെന്നും എരുമേലി റേഞ്ച് ഫോറസ്റ്റ് ഓഫീസർ ഹരിലാൽ പറഞ്ഞു.