ഡല്‍ഹി മുഖ്യമന്ത്രിയായി രേഖ ഗുപ്ത ഇന്ന് സത്യപ്രതിജ്ഞ ചെയ്യും

ഡൽഹി മുഖ്യമന്ത്രിയായി രേഖ ഗുപ്ത ഇന്ന് സത്യപ്രതിജ്ഞ ചെയ്ത് അധികാരമേൽഖ്കും. രാവിലെ 10 മണിക്ക് രാംലീല മൈതാനത്താണ് സത്യപ്രതിജ്ഞാ ചടങ്ങ് തുടങ്ങുക. ഉച്ചയ്ക്ക് പന്ത്രണ്ടരയ്ക്ക് ഗവർണർ സത്യവാചകം ചൊല്ലിക്കൊടുക്കുമെന്നാണ് വിവരം. ഒപ്പം ആറു മന്ത്രിമാരും ഇന്നുതന്നെ സത്യപ്രതിജ്ഞ ചെയ്ത് അധികാരമേൽക്കും. പ്രധാനമന്ത്രി നരേന്ദ്രമോദിയും അമിത്ഷായും എൻഡിഎയുടെ പ്രധാനപ്പെട്ട എല്ലാ നേതാക്കളും ചടങ്ങിൽ പങ്കെടുക്കും.

സുഷമ സ്വരാജ്, ഷീല ദീക്ഷിത്, അതിഷി എന്നിവർക്ക് ശേഷം ഡൽഹിയുടെ നാലാമത്തെ വനിതാ മുഖ്യമന്ത്രിയായിരിക്കും രേഖ ഗുപ്ത. സത്യപ്രതിജ്ഞ ചെയ്ത് അധികാരമേൽക്കുന്നതോടെ, മമത ബാനർജിയോടൊപ്പം രാജ്യത്തെ രണ്ടാമത്തെ വനിതാ മുഖ്യമന്ത്രിയായിരിക്കും അവർ. കൂടാതെ, നിലവിൽ ബിജെപി ഭരിക്കുന്ന സംസ്ഥാനങ്ങളിലെ ഏക വനിതാ മുഖ്യമന്ത്രി കൂടിയാകും രേഖ ഗുപ്ത. ബിജെപി സർക്കാരിൽ ഉപമുഖ്യമന്ത്രി ഉണ്ടാകുമോ ഇല്ലയോ എന്നതിനെക്കുറിച്ച് പാർട്ടിയിൽ നിന്ന് ഔദ്യോഗിക പ്രസ്താവനകളൊന്നും വന്നിട്ടില്ല. 

ഏകദേശം 50,000 പേർ ഇന്ന്  നടക്കുന്ന സത്യപ്രതിജ്ഞാ ചടങ്ങിൽ പങ്കെടുക്കും. പരിപാടിക്കായി നഗരത്തിലെ മധ്യ, വടക്കൻ,  പ്രദേശങ്ങളിലായി 25,000-ത്തിലധികം സുരക്ഷാ ഉദ്യോഗസ്ഥരെ വിന്യസിക്കും. കേന്ദ്ര നിരീക്ഷകരായ രവിശങ്കർ പ്രസാദിന്റെയും ഒ പി ധങ്കറിന്റെയും സാന്നിധ്യത്തിൽ ബുധനാഴ്ച നടന്ന നിയമസഭാ പാർട്ടി യോഗത്തിൽ പുതുതായി തിരഞ്ഞെടുക്കപ്പെട്ട 48 ബിജെപി എംഎൽഎമാരും പങ്കെടുത്തിരുന്നു. 

മുതിർന്ന പാർട്ടി നേതാക്കളായ പർവേഷ് വർമ്മ, വിജേന്ദ്ര ഗുപ്ത, സതീഷ് ഉപാധ്യായ എന്നിവരാണ് രേഖ ഗുപ്തയുടെ പേര് നിർദ്ദേശിച്ചത്. ഡൽഹി നിയമസഭാ തെരഞ്ഞെടുപ്പ് ഫലം പ്രഖ്യാപിച്ച് 11 ദിവസങ്ങൾക്ക് ശേഷമാണ് ഈ പ്രഖ്യാപനം വന്നത്. തൊട്ടുപിന്നാലെ, രേഖ ഗുപ്ത പ്രധാനമന്ത്രി നരേന്ദ്ര മോദിക്ക് നന്ദി പറഞ്ഞെത്തി. ഡൽഹിയിലെ ഓരോ നിവാസിയുടെയും ക്ഷേമത്തിനും ശാക്തീകരണത്തിനും സമഗ്രമായ വികസനത്തിനും വേണ്ടി പൂർണ്ണ സത്യസന്ധതയോടും സമർപ്പണത്തോടും കൂടി പ്രവർത്തിക്കുമെന്നും രേഖ ഗുപ്ത പറഞ്ഞു.

ഷാലിമാർ ബാഗ് സീറ്റിൽ നിന്ന് ആം ആദ്മി പാർട്ടി (എഎപി) സ്ഥാനാർത്ഥിയെ രേഖ ഗുപ്ത ഏകദേശം 30,000 വോട്ടുകൾക്ക് പരാജയപ്പെടുത്തി. ഡൽഹി മുനിസിപ്പൽ കോർപ്പറേഷനിൽ മൂന്ന് തവണ കൗൺസിലറായിരുന്ന അവർക്ക് ആർഎസ്എസുമായി ആഴത്തിലുള്ള ബന്ധമുണ്ട്. ആം ആദ്മി പാർട്ടിയുടെ ബന്ദന കുമാരിയെ 29,595 വോട്ടുകൾക്കാണ രേഖ ഗുപ്ത പരാജയപ്പെടുത്തിയത്.