യുഎസ് പോലീസ് വാഹനം ഇടിച്ച് മരിച്ച ജാൻവി കൻഡൂലയുടെ കുടുംബത്തിന് 262 കോടി രൂപ നഷ്ടപരിഹാരം

2023 ജനുവരിയിൽ അമിതവേഗതയിലെത്തിയ പോലീസ് വാഹനം ഇടിച്ച് മരിച്ച ഇന്ത്യൻ വിദ്യാർത്ഥിനി ജാൻവി  കൻഡൂലയുടെ കുടുംബത്തിന് 29 മില്യൺ ഡോളർ (ഏകദേശം 262 കോടി രൂപ) നഷ്ടപരിഹാരം നൽകാൻ സിയാറ്റിൽ അധികൃതർ സമ്മതിച്ചു. കുടുംബം ഫയൽ ചെയ്ത കേസിലാണ് ഈ ഒത്തുതീർപ്പ്.

കഴിഞ്ഞ വർഷം ജോലിയിൽ നിന്ന് പിരിച്ചുവിട്ട മുൻ സിയാറ്റിൽ പോലീസ് ഓഫീസർ കെവിൻ ഡേവിനും നഗരസഭയ്ക്കുമെതിരെ 2024-ൽ ഫയൽ ചെയ്ത 110 മില്യൺ ഡോളറിന്റെ വ്യവഹാരമാണ് ഈ ഒത്തുതീർപ്പിലൂടെ അവസാനിക്കുന്നത്. നഷ്ടപരിഹാരത്തുകയുടെ ഏകദേശം 20 മില്യൺ ഡോളറും  ഇൻഷുറൻസ് വഴി ലഭിക്കുമെന്നാണ് പ്രതീക്ഷിക്കുന്നത്.

ഒത്തുതീർപ്പ് പ്രഖ്യാപിച്ചുകൊണ്ടുള്ള പ്രസ്താവനയിൽ, ജാൻവി  കൻഡൂലയുടെ മരണം ഏറെ വേദനയുണ്ടാക്കുന്നതാണെന്ന് അഭിഭാഷക എറിക ഇവാൻസ് പറഞ്ഞു. സാമ്പത്തിക കരാർ കുടുംബത്തിന് ആശ്വാസം നൽകുമെന്നും അവർ പ്രത്യാശ പ്രകടിപ്പിച്ചു. ജാൻവി കൻഡൂലയുടെ ജീവൻ വിലപ്പെട്ടതാണെന്നും ഇവാൻസ് കൂട്ടിച്ചേർത്തു.