രാജ്യസഭയിൽ സിഎപിഎഫ് ബില്ലിനെതിരെ പ്രതിപക്ഷ പ്രതിഷേധം; അവതരണം തടഞ്ഞു

കേന്ദ്ര സായുധ പോലീസ് സേനകളുടെ (സിഎപിഎഫ്) ഭരണനിർവ്വഹണത്തിനായി സർക്കാർ കൊണ്ടുവന്ന പുതിയ ബില്ലിനെതിരെ രാജ്യസഭയിൽ പ്രതിപക്ഷത്തിൻ്റെ കടുത്ത പ്രതിഷേധം. തൃണമൂൽ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ നടപടിക്രമങ്ങളിൽ വീഴ്ച ആരോപിച്ച് രംഗത്തെത്തിയതോടെ ബിൽ അവതരിപ്പിക്കുന്നത് തടസ്സപ്പെട്ടു. പ്രതിഷേധത്തെത്തുടർന്ന് തൃണമൂൽ എംപിമാർ സഭയിൽ നിന്ന് ഇറങ്ങിപ്പോയി. അതേസമയം ബില്ലിന്മേൽ എട്ട് മണിക്കൂർ ചർച്ച നടത്താൻ ബിസിനസ് അഡ്വൈസറി കമ്മിറ്റി സമയം അനുവദിച്ചിട്ടുണ്ട്.സിആർപിഎഫ്, ബിഎസ്എഫ്, ഐടിബിപി, എസ്എസ്ബി, സിഐഎസ്എഫ് എന്നീ അഞ്ച് കേന്ദ്ര സേനകളെ ഏകീകൃത ഭരണസംവിധാനത്തിന് കീഴിൽ കൊണ്ടുവരിക എന്നതാണ് സിഎപിഎഫ് ബില്ലിൻ്റെ പ്രധാന ലക്ഷ്യം. മുതിർന്ന തസ്തികകളിൽ ഐപിഎസ് ഉദ്യോഗസ്ഥരുടെ നിയമനം ഔദ്യോഗികമാക്കുന്നതിനും റിക്രൂട്ട്‌മെന്റ്, പ്രൊമോഷൻ നടപടികൾ ഏകീകരിക്കുന്നതിനുമാണ് ഈ നിയമനിർമ്മാണം.