16 വയസ്സിന് താഴെയുള്ള കുട്ടികൾക്ക് സോഷ്യൽ മീഡിയ നിരോധിക്കും

16 വയസ്സിന് താഴെയുള്ള കുട്ടികൾ സോഷ്യൽ മീഡിയ ഉപയോഗിക്കുന്നത് സംസ്ഥാന സർക്കാർ നിരോധിക്കുമെന്ന് കർണാടക മുഖ്യമന്ത്രി സിദ്ധരാമയ്യ വെള്ളിയാഴ്ച പ്രഖ്യാപിച്ചു. നിയമസഭയിൽ 2026–27 സംസ്ഥാന ബജറ്റ് അവതരിപ്പിക്കുന്നതിന് ഇടെയാണ് അദ്ദേഹം ഈ പ്രഖ്യാപനം നടത്തിയത്.ഏകദേശം 4.20 ലക്ഷം കോടി രൂപ പ്രതീക്ഷിക്കുന്ന ബജറ്റ് ബെംഗളൂരുവിലെയും മറ്റ് പിന്നോക്ക പ്രദേശങ്ങളിലെയും ക്ഷേമ പദ്ധതികളിലും അടിസ്ഥാന സൗകര്യ വികസനത്തിലും ശ്രദ്ധ കേന്ദ്രീകരിക്കും.

കുട്ടികളുടെ സോഷ്യൽ മീഡിയ പ്രവേശനം നിയന്ത്രിക്കുക എന്ന ആശയം കുറച്ചു കാലമായി കർണാടക സർക്കാരിനുള്ളിൽ ചർച്ചയിലായിരുന്നു.

യുവ ഉപയോക്താക്കൾക്കിടയിൽ കൃത്രിമബുദ്ധിയുടെയും സോഷ്യൽ മീഡിയയുടെയും ഉത്തരവാദിത്തപരമായ ഉപയോഗം ഉറപ്പാക്കുന്നതിനുള്ള സാധ്യമായ നടപടികൾ സർക്കാർ പരിശോധിച്ചുവരികയാണെന്ന് സംസ്ഥാന ഐടി, ബയോടെക്നോളജി മന്ത്രി പ്രിയങ്ക് ഖാർഗെ ഈ വർഷം ആദ്യം നിയമസഭയിൽ പറഞ്ഞിരുന്നു.

അമിതമായ സ്‌ക്രീൻ എക്‌സ്‌പോഷറിന്റെ കുട്ടികളിലെ പ്രത്യാഘാതങ്ങളെക്കുറിച്ച് ആരോഗ്യമന്ത്രി ദിനേശ് ഗുണ്ടു റാവുവും ആശങ്ക പ്രകടിപ്പിച്ചിരുന്നു.

അനിയന്ത്രിതമായ സോഷ്യൽ മീഡിയ എക്സ്പോഷർ വിദ്യാഭ്യാസത്തിനും കുടുംബ പരിസ്ഥിതിക്കും ദോഷം ചെയ്യുമെന്ന് മുന്നറിയിപ്പ് നൽകി, ബിജെപി എംഎൽഎയും മുൻ മന്ത്രിയുമായ സുരേഷ് കുമാർ ഈ വിഷയം ഗൗരവമായി കാണണമെന്ന് സർക്കാരിനോട് ആവശ്യപ്പെട്ടിരുന്നു.