ഇറാനെ സാമ്പത്തികമായി ഒറ്റപ്പെടുത്തി ലോകരാജ്യങ്ങൾ; നേട്ടം ആഘോഷിച്ച് അമേരിക്കൻ ട്രഷറി വിഭാഗം

ഇറാനെ ആഗോളതലത്തിൽ ഒറ്റപ്പെടുത്താനുള്ള നയതന്ത്ര നീക്കങ്ങൾ വിജയം കാണുന്നതായി യുഎസ് ട്രഷറി സെക്രട്ടറി സ്കോട്ട് ബെസ്സന്റ്. ലോകമെമ്പാടുമുള്ള വിവിധ രാജ്യങ്ങളിലേക്ക് തങ്ങളുടെ പ്രതിനിധികളെ അയച്ച് ഇറാനെതിരെ സാമ്പത്തിക ഉപരോധം കർശനമാക്കാൻ സമ്മർദ്ദം ചെലുത്തിയതായി അദ്ദേഹം വ്യക്തമാക്കി. ഇതേതുടർന്ന് ഇറാന്റെ എയർലൈനുകൾക്കും ബാങ്കുകൾക്കുമെതിരെ വിവിധ രാജ്യങ്ങൾ കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്.

അമേരിക്കയുടെ നിർദ്ദേശങ്ങൾ പാലിച്ച് നിരവധി രാജ്യങ്ങൾ ഇറാനിയൻ വിമാന സർവീസുകൾക്കും സാമ്പത്തിക ഇടപാടുകൾക്കും നിരോധനം ഏർപ്പെടുത്തിയിട്ടുണ്ട്. തുർക്കിയും ഒമാനും ഇറാന്റെ സ്വകാര്യ വിമാനക്കമ്പനിയായ മഹാൻ എയറിന്റെ സർവീസുകൾ പൂർണ്ണമായും നിർത്തിവെച്ചു. കൂടാതെ യുഎഇ എല്ലാ ഇറാനിയൻ വിമാനക്കമ്പനികളുടെയും സർവീസുകൾ പൂർണ്ണമായി നിരോധിച്ചു.

ഇറാന്റെ പ്രധാന വാണിജ്യ കേന്ദ്രവും വലിയ തോതിൽ ഇറാനികൾ താമസിക്കുന്നതുമായ ദുബായിലേക്ക് പ്രതിദിനം നിരവധി വിമാനങ്ങൾ സർവീസ് നടത്തിയിരുന്നു. എന്നാൽ പുതിയ യാത്രാ നിരോധനത്തോടെ ഇറാന്റെ വ്യോമയാന മേഖല കടുത്ത പ്രതിസന്ധിയിലായിട്ടുണ്ട്. വിമാനങ്ങൾക്ക് ഇന്ധനം നൽകുന്നതിനും ലാൻഡിംഗ് സേവനങ്ങൾ നൽകുന്നതിനും അമേരിക്ക കർശന വിലക്ക് ഏർപ്പെടുത്തിയിട്ടുണ്ട്.