ഭീകരാക്രമണ നീക്കം തകർത്തെന്ന് പ്രസിഡന്റ് ഡൊണാൾഡ് ട്രംപ്

യുകെയിലെ പ്രമുഖ സൈനിക വ്യോമസേനാ താവളത്തിന് നേരെ വലിയ ഭീകരാക്രമണം നടത്താനുള്ള നീക്കം ബ്രിട്ടീഷ് സുരക്ഷാ ഏജൻസികൾ വിജയകരമായി തകർത്തു. ഗ്ലൗസെസ്റ്റർഷെയറിലെ ആർഎഎഫ് ഫെയർഫോർഡ് വ്യോമതാവളത്തിന് സമീപത്തുനിന്നും സ്ഫോടകവസ്തുക്കളും ആക്രമണ പദ്ധതികളുമായി എത്തിയ അഞ്ചുപേരെ ആംഡ് പോലീസ് സംഘം പിടികൂടി.

സംഭവത്തെക്കുറിച്ച് പ്രതികരിച്ച അമേരിക്കൻ പ്രസിഡന്റ് ഡൊണാൾഡ് ട്രംപ്, വ്യോമസേനാ കേന്ദ്രത്തിന് വലിയ നാശനഷ്ടങ്ങൾ വരുത്താനാണ് പ്രതികൾ ലക്ഷ്യമിട്ടിരുന്നതെന്ന് വ്യക്തമാക്കി. യുഎസ് ബോംബർ വിമാനങ്ങളും സൈനികരും തങ്ങുന്ന താവളത്തിന് നേരെയായിരുന്നു ഈ ആക്രമണ നീക്കം.

അമേരിക്കൻ, ബ്രിട്ടീഷ് രഹസ്യാന്വേഷണ ഏജൻസികൾ ഏറെ നാളായി ഇവരെ സൂക്ഷ്മമായി നിരീക്ഷിച്ചു വരികയായിരുന്നുവെന്നും ട്രംപ് വെളിപ്പെടുത്തി. ഇരു രാജ്യങ്ങളിലെയും സുരക്ഷാ വിഭാഗങ്ങൾ സംയുക്തമായി നടത്തിയ നീക്കങ്ങൾക്കൊടുവിലാണ് ഭീകരരെ പിടികൂടാൻ സാധിച്ചതെന്ന് അദ്ദേഹം കൂട്ടിച്ചേർത്തു.