അമേരിക്കയില്‍ ടിക് ടോക്ക് വീണ്ടും സജീവമാകുന്നു: ഗൂഗിളും ആപ്ലിളും ആപ്പ് സ്റ്റോറുകളില്‍ ലഭ്യമാക്കി
പ്രമുഖ ചൈനീസ് വീഡിയോ ഷെയറിങ് ആപ്പായ ടിക് ടോക്ക് അമേരിക്കയില്‍ വീണ്ടും സജീവമാകുന്നു.
ന്യൂയോര്‍ക്ക്: പ്രമുഖ ചൈനീസ് വീഡിയോ ഷെയറിങ് ആപ്പായ ടിക് ടോക്ക് അമേരിക്കയില്‍ വീണ്ടും സജീവമാകുന്നു. ആപ്പിനെ അമേരിക്കയില്‍ നിലനിര്‍ത്തുമെന്ന പ്രസിഡന്റ് ഡൊണാള്‍ഡ് ട്രംപിന്റെ പ്രഖ്യാപനത്തിന് പിന്നാലെ ഗൂഗിളും ആപ്ലിളും തങ്ങളുടെ അമേരിക്കന്‍ ആപ്പ് സ്റ്റോറുകളില്‍ ടിക് ടോക് ആപ്പ് ലഭ്യമാക്കി തുടങ്ങി. നേരത്തെ നിരോധനം പ്രഖ്യാപിച്ചതിനെ തുടര്‍ന്ന് ഗൂഗിള്‍ പ്ലേ സ്റ്റോറില്‍ നിന്നും ആപ്പ് സ്റ്റോറില്‍ നിന്നും ആപ്പ് നീക്കം ചെയ്തിരുന്നു.
വ്യാഴാഴ്ച വൈകുന്നേരത്തോടെയാണ് ആപ്പിള്‍ ആപ്പ് സ്റ്റോറില്‍ ടിക് ടോക്ക് ആപ്പ് പുനസ്ഥാപിച്ചതെന്നാണ് പ്രമുഖ അന്തര്‍ദേശീയ മാധ്യമങ്ങളായ ബ്ലൂംബെര്‍ഗും സി എന്‍ ബി സിയും റിപ്പോര്‍ട്ട് ചെയ്യുന്നത്. കഴിഞ്ഞ ഏപ്രിലില്‍ അന്നത്തെ പ്രസിഡന്റ് ജോ ബൈഡന്‍ ഒപ്പുവച്ച നിയമത്തെ തുടര്‍ന്ന് ആപ്പിന്റെ അമേരിക്കയിലെ പ്രവര്‍ത്തനം പ്രതിസന്ധിയിലാകുകയായിരുന്നു.
നിയമത്തിന്റെ അടിസ്ഥാനത്തില്‍ അമേരിക്കയില്‍ നിന്നുള്ള ഒരു ഉടമയ്ക്കോ അവരുടെ സഖ്യകക്ഷികളില്‍ ഒരാള്‍ക്കോ ആപ്പ് വില്‍ക്കാന്‍ 270 ദിവസത്തെ സമയമാണ് ടിക് ടോക് ഉടമസ്ഥരായ ബൈറ്റ്ഡാന്‍സിന് നല്‍കിയത്. അല്ലെങ്കില്‍ അമേരിക്കയുടെ ദേശീയ സുരക്ഷാ ആശങ്കകള്‍ കണക്കിലെടുത്ത് വിലക്ക് നേരിടേണ്ടി വരുമെന്നും വ്യക്തമാക്കിയിരുന്നു. നിയമത്തിന്റെ അടിസ്ഥാനത്തില്‍ ജനുവരി 19 ടിക് ടോക്കിന് അമേരിക്കയിലെ പ്രവര്‍ത്തനങ്ങള്‍ അവസാനിപ്പിക്കേണ്ടി വന്നു.
എന്നാല്‍ ട്രംപ് അധികാരത്തില്‍ തിരിച്ച് വന്നതിന് പിന്നാടെ ടിക് ടോക്കും അമേരിക്കയിലേക്ക് തിരിച്ചെത്തി. നിരോധനം താല്‍ക്കാലികമായി നിര്‍ത്തുന്നുവെന്നായിരുന്നു ട്രംപിന്റെ പ്രഖ്യാപനം. ഇതോടെ ഏകദേശം 14 മണിക്കൂര്‍ നീണ്ടുനിന്ന ഉപരോധത്തിന് ശേഷം ടിക് ടോക് അമേരിക്കയില്‍ വീണ്ടും സജീവമായി. ടിക്ക് ടോക്കിന്റെ ഉടമസ്ഥാവകാശത്തില്‍ 50 ശതമാനം അമേരിക്കയ്ക്ക് ലഭിക്കുമെങ്കില്‍ സേവനം വീണ്ടും ആരംഭിക്കാമെന്ന വാഗ്ദാനവും ട്രംപ് മുന്നോട്ട് വെച്ചിരുന്നു. നിയമത്തില്‍ നിന്ന് രക്ഷ നേടാന്‍, ടിക് ടോക്കിന് ഒരു പുതിയ ഡീലുണ്ടാക്കാന്‍ സമയം കൊടുക്കാന്‍ ആഗ്രഹിക്കുന്നുവെന്നും അദ്ദേഹം പറഞ്ഞു.
അതേസമയം, അഞ്ച് വര്‍ഷം മുന്‍പ് നിരോധിച്ച ചൈനീസ് ആപ്പുകളില്‍ പലതും ഇന്ത്യയിലേക്ക് തിരിച്ചെത്താനൊരുങ്ങുന്നതായി റിപ്പോര്‍ട്ടും കഴിഞ്ഞ ദിവസം പുറത്ത് വന്നിട്ടുണ്ട്. ഇതോടെ വലിയ ജനപ്രീതിയുണ്ടായിരുന്ന ടിക് ടോക്കും ഇന്ത്യയിലേക്ക് തിരിച്ചെത്തുമോയെന്ന ചര്‍ച്ചകളും സജീവമാണ്.
What's Your Reaction?
