അഭിമാനം അമൻ; ഒളിമ്ബിക്‌സില്‍ ഇന്ത്യയ്ക്ക് വീണ്ടും വെങ്കലം

വെങ്കല പോരാട്ടത്തില്‍ പോർട്ടറിക്കോയുടെ ഡാരിയൻ ക്രൂസിനെ കീഴടക്കിയാണ് അമൻ ഇന്ത്യയ്ക്ക് ആറാം മെഡല്‍ സമ്മാനിച്ചത്. ആദ്യ നീക്കങ്ങളില്‍ പോർട്ടറിക്കോ താരം മുന്നിലെത്തിയെങ്കിലും അമൻ ശക്തമായി തിരിച്ചുവരികയായിരുന്നു.13-5നായിരുന്നു ഇരുപത്തിയൊന്നുകാരനായ അമന്റെ വിജയം.

പ്രീക്വാർട്ടറിലും ക്വാർട്ടറിലും മിന്നും വിജയമാണ് നേടിയത്. ക്വാർട്ടറില്‍ ഉത്തര മാസിഡോണിയയുടെ വ്ളാദിമർ എഗോറോവിനെ 100ന് തോല്‍പ്പിച്ചാണ് അമൻ സെമിയിലേക്ക് മുന്നേറിയത്. എന്നാല്‍ സെമി ഫൈനലില്‍ ലോക ഒന്നാം നമ്ബർ താരവും ലോക ചാംപ്യനുമായ ജപ്പാന്റെ ഹിഗൂച്ചിയോട് തോല്‍വി വഴങ്ങുകയായിരുന്നു.2008 ബെയ്ജിങ് മുതല്‍ എല്ലാ ഒളിംപിക്സുകളിലും ഗുസ്തിയില്‍ ഇന്ത്യ മെഡല്‍ നേടിയിട്ടുണ്ട്.

ഇന്ത്യക്ക് ആറ് മെഡലുകള്‍

ഒരു വെള്ളിയും അഞ്ച് വെങ്കലവുമായി ആകെ ആറ് മെഡലുകളാണ് പാരീസ് ഒളിമ്ബിക്സില്‍ ഇന്ത്യ നേടിയിരിക്കുന്നത്. രാജ്യങ്ങളുടെ റാങ്കിങ്ങില്‍ ഇന്ത്യ അറുപത്തിയൊൻപതാം സ്ഥാനത്താണ്. ഒളിമ്ബിക്സ് പതിനഞ്ചാം ദിവസം പിന്നിടുമ്ബോള്‍ അമേരിക്കയാണ് ഒന്നാം സ്ഥാനത്ത്. 30 സ്വർണ്ണം,38 വെള്ളി, 35 വെങ്കലം ഉള്‍പ്പടെ 103 മെഡലുകളാണ് അമേരിക്ക നേടിയത്. രണ്ടാം സ്ഥാനത്ത് ചൈനയാണ്. 29 സ്വർണവും 25 വെള്ളിയും 19 വെങ്കലവുമായി 73 മെഡലുകള്‍ നേടി. 18 സ്വർണവും 14 വെള്ളിയും 13 വെങ്കലവുമായി നാല്‍പത്തിയഞ്ച് മെഡല്‍ നേടിയ ഓസ്ട്രേലിയയാണ് മൂന്നാം സ്ഥാനത്ത്.