kochi to dubai flight news: യാത്രാപ്രശ്നങ്ങളിൽ കുടുങ്ങി ചെറിയ വരുമാനക്കാരായ പ്രവാസികൾ – expats travel to kerala is difficult and expensive

കോവിഡ് പടർന്ന് പിടിച്ചപ്പോളാണ് പ്രവാസികൾ വലിയ രീതിയിൽ യാത്ര ബുദ്ധിമുട്ടികൾ അനുഭവിച്ചത്. പല അന്താരാഷ്ട്ര വിമാന സർവീസുകളും നിർത്തുകയും, വിമാന കമ്പനികൾ സർവീസുകൾ വെട്ടിക്കുറക്കുകയും ചെയ്തു. ഇതോടെ യാത്ര പ്രശ്നങ്ങൾ വലിയ ചർച്ചയായി വന്നു. കോവിഡ് ഏറെക്കുറെ അവസാനിച്ചപ്പോളാണ് സർവീസുകൾ സാധാരണ നിലയിലേക്ക് വന്നു തുടങ്ങിയത്. ഏറെക്കാലത്തിന് ശേഷം അവധിക്ക് നാട്ടിൽ പോകാൻ കാത്തിരിക്കുന്നവരും ഉണ്ട്. എന്നാൽ ഇന്നും പ്രവാസികളുടെ യാത്ര പ്രശ്നത്തിന് ശരിയായ ഒരു പരിഹാരമായിട്ടില്ല. ഇന്നും പല ഗൾഫ് രാജ്യങ്ങളിൽ നിന്നും കേരളത്തിലേക്കുള്ള യാത്രച്ചെലവ് വളരെ കൂടുതലാണ്.

തിരുവനന്തപുരം, കണ്ണൂർ, കോഴിക്കോട് വിമാനത്താവളങ്ങളിലേക്ക് പൊള്ളുന്ന ടിക്കറ്റ് വിലയാണ് ഇപ്പോഴുള്ളത്. കുടുംബങ്ങളുമായി നാട്ടിലേക്ക് വരാനിരിക്കുന്ന പലരും യാത്രകൾ വേണ്ടെന്ന് വെക്കുന്ന അവസ്ഥായിലാണ്. രണ്ട് വർഷത്തിന് ശേഷം സ്വന്തം കുടുംബത്തെ കാണാൻ നാട്ടിലേക്ക് വരാനിരിക്കുന്നവർക്ക് ടിക്കറ്റ് നിരക്ക് വലിയ തലവേദനയായിരിക്കുന്നു. ഉയർന്ന ശമ്പളത്തിന് ജോലി ചെയ്യുന്നവർക്ക് ഇത് ഒരു പ്രശ്നമാകില്ല. എന്നാൽ ചെറിയ ശമ്പളത്തിന് ജോലി ചെയ്യുന്നവർക്ക് ഇത് വലിയ പ്രശ്നമാണ്.

തിരുവനന്തപുരം എയർപോർട്ടിലേക്ക് ഖത്തറിൽ നിന്നും ഖത്തർ എയർവേയ്സ് മാത്രമാണ് നേരിട്ട് സർവ്വീസ് നടത്തുന്നത്. ഖത്തർ എയർവേയ്സിൽ പ്രവാസികൾക്ക് യാത്ര ചെയ്യാൻ കൂടുതൽ തുക ചെലവഴിക്കേണ്ടി വരുന്നു. ഇത് പലപ്പോഴും സാധാരണക്കാരായ പ്രവാസികൾക്ക് താങ്ങാൻ സാധിക്കാത്ത വിധത്തിലാണ്. ബജറ്റ് എയർലൈൻ ആയ ഇൻഡിഗോ നേരത്തെ നിർത്തിയ സർവ്വീസ് ഇതുവരെ പുനരാംഭിച്ചിട്ടില്ല. എയർ ഇന്ത്യാ എക്സ്പ്രസ് ആവട്ടെ കോഴിക്കോട് വഴിയും. എയർ ഇന്ത്യാ എക്സ്പ്രസിന് പുറമെ, മറ്റു രാജ്യങ്ങളിലൂടെയുള്ള കണക്ഷൻ വിമാനങ്ങളാണ് പലരുടേയും ആശ്രയം. കണക്ഷൻ വിമാനങ്ങൾ കയറിപ്പോകുമ്പോൾ വലിയ കാത്തിരിപ്പാണ് ഉണ്ടാകുന്നത്. വിമാനം റദ്ദാക്കൽ വരെയുള്ള സംഭവങ്ങൾ പലപ്പോഴും വരുന്നുണ്ട്. കുടുംബങ്ങളുമായി പോകുന്നവർ ആണ് ഇതുകൊണ്ട് വലിയ പ്രയാസങ്ങൾ നേരിടുന്നത്. നിരവധി പരാതികൾ ഇതുമായി ബന്ധപ്പെട്ട് ഉയർന്നു വരാറുണ്ട്.

തിരുവനന്തപുരം, കൊല്ലം, പത്തനംതിട്ട, ആലപ്പുഴ – കോട്ടയം ജില്ലകളിലെ ആളുകൾ മാത്രമല്ല തിരുവനന്തപുരം വിമാനത്താവളം ഉപയോഗിക്കുന്നത്. തമിഴ്നാട്ടിലെ നാഗർകോവിൽ, കന്യാകുമാരി, തൂത്തുകുടി, തെങ്കാശി എന്നീ ജില്ലകളിൽ നിന്നുള്ളവരും തിരുവന്തപുരം എയർപോർട്ട് ആണ് ഉപയോഗിക്കാറ്.
തിരുവനന്തപുരം ഇൻറർ നാഷണൽ എയർപോർട്ട് യൂസേഴ്സ് ഫോറം ഇൻ ഖത്തർ (TAUFIQ) ഏറെ പ്രവർത്തനങ്ങളാണ് യാത്രാ ദുരിതം പരിഹരിക്കാനായി നടത്തുന്നത്. സമാനമായ പ്രവർത്തനങ്ങൾ മറ്റ് പല സംഘടനകളും കേരളത്തിലെ ഇതരം വിമാനത്താവളങ്ങളെ കേന്ദ്രീകരിച്ച് നടത്തുന്നുണ്ട്. ഇന്ത്യയിലെ മേജർ എയർപോർട്ടുകളിലൊന്നായ കണ്ണൂർ എയർപോർട്ടിൽ നിന്ന് വിദേശ വിമാനക്കമ്പനികൾക്ക് പ്രവർത്തിക്കുന്നതിന് അനുമതി ഇതുവരെ നൽകിയിട്ടില്ല. ഇന്ത്യൻ വിമാനക്കമ്പനികൾ മാത്രമേ കണ്ണൂർ എയർപോർട്ടിലേക്ക് യാത്ര നടത്തൂ. നേരത്തെ ഇവിടേക്ക് എയർ ഇന്ത്യാ എക്സ്പ്രസും ഇൻഡിഗോയും സർവ്വീസ് നടത്തിയിരുന്നെങ്കിലും ഇൻഡിഗോ നേരിട്ടുള്ള സർവ്വീസുകൾ നിർത്തിയിരിക്കുകയാണ്. ഇത് യാത്രക്കാർക്ക് വലിയ ബുദ്ധിമുട്ട് ഉണ്ടാക്കുന്നുണ്ട്. കണ്ണൂർ എയർപോർട്ടിലെ യാത്രാ പ്രശ്നങ്ങൾക്ക് പരിഹാരം കാണാൻ സജീവ ശ്രമങ്ങൾ നടത്തുന്ന സംഘടനയാണ് കണ്ണൂർ യുനൈറ്റഡ് വെൽഫെയർ അസോസിയേഷൻ ഖത്തർ (Kannur United Welfare Association Qatar (KUWAQ).

പ്രശ്നപരിഹാരത്തിനായി പല തരത്തിലുള്ള ഇടപെടലുകൾ പ്രവാസി സംഘനകൾ തന്നെ നടത്തി കഴിഞ്ഞു. വിദേശകാര്യ സഹമന്ത്രി വി. മുരളീധരൻ ഉൾപ്പടെയുള്ളവർക്ക് ഇതുമായി ബന്ധപ്പെട്ട് നിവേദനം നൽകിയിട്ടുണ്ട്. എന്നാൽ പ്രവാസികൾക്ക് ഉപകാരമാകുന്ന തരത്തിലുള്ള ഒരു തീരുമാനം ഇതുവരെ എത്തിയിട്ടില്ല. എല്ലാ എയർപോർട്ടുകൾക്കും അന്താരാഷ്ട്ര വിമാന സർവീസ് അനുമതി നൽകുക. എല്ലാ ഗൾഫ് രാജ്യങ്ങളിൽ നിന്ന് നേരിട്ട് കൂടുതൽ വിമാനങ്ങൾ സർവീസ് കേരളത്തിലേക്ക് നടത്തുക. അവധിക്കാലത്തെ അമിത ചാർജ്ജ് ഒഴിവാക്കുക തുടങ്ങിയ കാര്യങ്ങളിൽ പരിഹാരം കണ്ടെത്തിയാൽ തന്നെ പ്രവാസികളുടെ യാത്രാ പ്രശ്നങ്ങൾക്ക് വലിയ പരിഹാരമായിത്തീരും.